ШУТИС-ийн оюутнууд Япон улсад мэргэжлийн дадлага амжилттай гүйцэтгэж байна
ШУТИС-ийн БУХС-ийн Захиргаа нь Япон улсын сүлжээ зочид буудлуудын удирдлагатай байгуулсан гэрээний дагуу Аялал жуулчлалын менежментийн ангийн оюутнууд мэргэжлийн дадлагыг 1 жилийн хугацаатай Япон улсад гүйцэтгэж байгаа билээ. Дадлагын хөтөлбөрийн хүрээнд Япон улсын "Юкай Резорт" болон бусад дээд зэрэглэлийн зочид буудлууд, амралтын газруудын төрөл бүрийн ажлын байран дээр оюутнууд суралцах, тодорхой ажлуудыг удирдамжийн дагуу хийж өөрсдийн практик мэдлэг, ур чадвараа нэмэгдүүлэх, ажлын дадал, туршлагыг үйлчилгээний салбар өндөр хөгжсөн оронд олж авч байгаа нь сайн мэргэжилтэн болж бэлтгэгдэн гарахад нь чухал хувь нэмрийг оруулж байна. Япон улсын хуулийн дагуу оюутнууд эрүүл мэндийн даатгалд бүрэн хамрагдах, ажлын байрны аюулгүй байдал, дадлагажигч оюутны эрх ашиг, дадлага хийх нөхцөл хуулиар хамгаалагдсан болно. Япон улсын зочид буудлуудын удирдлагын зүгээс ШУТИС-ийн оюутнуудын дадлагын ажлын гүйцэтгэлд өндөр сэтгэл ханамжтай байгааг илэрхийлсэн байна.